我的軍旅生涯

我的軍旅生涯

旅行返港，公司不太忙顯得有點清閒，靜下來就想起往事，其中一件經常令小弟回味又自豪（自豪而家想玩都冇），係少年（家陣都係少年）時（10年前）做過參加過義勇軍，正確來說是「皇家香港軍團（義勇軍）」又稱「老防（防衛軍）」（很黑社會的叫法），自從一次大戰就成立，二次大戰保衛過香港、打過日本仔，能夠參加到最後一屆，雖然只是夠年齡當Junior Boy少年領袖團（10年前都係得十幾歲）但已相當榮幸（同過鄧梓豐一車），參加軍團除了學習軍事技巧、紀律外，仲認識了英國的軍事制度、文化（可謂重點），更因而愛上飲奶茶（軍團大量供應），響度除了回憶往事外，更要清楚說明「我參加唔係赤柬，係保衛過香港、捉過I.I.的義勇軍」（一些無聊四經常話赤柬，激死！）。

入隊：

小學年代，電視上依然有「請加入皇家香港軍團」的TVC，初中時代見報紙上有「義勇軍少年領袖團」的相關介紹，已經好想加入，後來見電視（唔知點解係）「婦女新知」（激死）又介紹，自已一個就膽粗粗由大埔老家去到跑馬地體育路的義勇軍總部（現已成為馬會總部）填表加入。
記得加入前要經體能測試，好簡單，就在跑馬地馬場內的運動場跑兩個圈（又好似係千二米），當日著了帆船鞋（當年興）、鬆身老牛，幸好當年少肥肉、跑得快，順利過關（好像唔覺有人唔過關），其後收到信（政府公函面頭仲有軍團印，信件一律冇中文又相當英式！），正式收了小弟，對加入軍團的第一日印像已不太深，記得取得一身制服（Jungle Hat、Beret、迷彩上衫、綠色軍褲、軍Boot、PT uniform）（條褲唔多?身）其後又有集隊（小弟編入了4 Troop），而且第一個受罰的係小弟，只因多咀講多兩句，就立即做了五下掌上壓，此事就成為第一日加入義勇軍最深的印像。

軍事技巧：

雖然，加入的只是少年領袖團（一般周未練習），但已學習得不少軍事技巧，可惜冇格鬥同自由搏擊，唔係真係打得。

英式步操：「By the front quick March」．．．起初星期日到跑馬地，就是學習步操，記得要避開操場內的泊車位又或操到差不多走出馬路，但英式步操整齊，亦比大陸的俄式好看得多，後來入營期間（西貢、粉嶺、石崗、昂船洲），都跟了英籍教官學步操及槍操，雖苦但亦得益不少。

射擊：只試過兩次的實戰射擊，分別在跑馬地總部及石崗軍營，當時採用的L1A1(FN FAL)步槍，重達11磅（M16相信得一半），而且為免受傷Junior Boy都只用改了.22的L1A1，有頑皮的師兄可能見.22不是味兒（原是7.62大口徑），竟然用上近連發的速度（只能點發）射光子彈，相當相當搞笑。（一次在總部需持槍跑上天台的靶場，幻像是好型之際，竟然發生PK事件...此乃後話）。

無線電：一般的無線電技巧，例如「Hello XXX , This is YYY。」，亦試過背上真正的軍用電台，記住「Roger Out」係完結用，唔好下下「Roger」。

遠足：雖然只是採用了愛丁堡公爵獎勵計劃的行山項目，但一班Junior Boy依然要一身戎裝上陣，試過在海下灣有蟹入了營（嚇得我）、在港島跑一邊是引水道一邊是因大霧而不見底的山坡、仲有可能智障（外型有點似）的同Troop少年，唔知點解可引到整個飯兜是黑蟻，好在每人一個兜煮自己的食物。

坐直升機：雖然唔洗點學，但都穿上壓縮氣充氣的救生衣，石崗機場的機師都算唔話得，將大開機門的直升機飛到打側，另一次則由中環坐直升機到西貢露營，相當爽！

攻擊隊型：實習中只有一次，由師兄帶領下一次平原上箭型的進攻，可惜組合得不太成功。

攀石：於港島學校練習，只得一次。

絕對服從：唔算是甚麼技巧，但比以上要學的來得重要，由此亦學得先安靜聆聽、守紀律，亦因此覺得香港人太自由了，將個人自由無限擴大而影響別人的自由（此又乃後話）。

擦鞋：真正的擦鞋，「老防」的軍Boot鞋頭要擦得如鏡面（我總做不到），幸好有師兄加同Troop兄弟教路，起初以鞋油轉圈打底，再以火機燒溶鞋油（輕輕的），最後以濕水的布輕擦、打圈，照計唔鏡面都有光澤的。

實在是太多的開心回憶，唔洗錢有野學、有野玩，仲有大碌炮搞笑（同Troop兄弟），仲有得玩就好！ （當年的兄弟見字請回）

依然健在的軍團會所：http://www.rhkr.org/crhkr/